Muling binuhay ng Southeast Asian Regional Center for Graduate Study and Research in Agriculture (SEARCA) ang Professorial Chair Program para sa University of the Philippines Los Baños (UPLB), bilang patunay ng patuloy nitong pagkilala sa kahusayan sa akademya at pagpapalakas ng matagal nang ugnayan ng dalawang institusyon sa pagsusulong ng agrikultura at napapanatiling kaunlaran sa Timog-Silangang Asya.
Kasabay ng pagbabalik ng programa, iginawad ng SEARCA ang Professorial Chair para sa Academic Year 2026–2027 kay Prof. Dixon T. Gevaña, direktor ng UPLB Forestry Development Center, bilang pagkilala sa kanyang mahalagang ambag sa pagsasama ng agham, paggawa ng polisiya, at pangangalaga sa kalikasan sa pamamagitan ng mga komunidad. Kabilang sa kanyang mga natatanging kontribusyon ang pangangalaga sa bakawan (mangrove conservation), carbon governance, at climate adaptation.
Ayon sa SEARCA, ang pagbabalik ng Professorial Chair Program ay higit pa sa isang pagkilala sa indibidwal na kahusayan. Isa rin itong pagpapatibay sa matagal nang pakikipagtuwang ng UPLB bilang host institution ng SEARCA, na nagsisilbing katuwang sa pagpapatupad ng mga rehiyonal na programa, pagbibigay ng graduate scholarship study posts, at pagsuporta sa mga pananaliksik sa agrikultura. Ang Chancellor ng UPLB ay bahagi rin ng SEARCA Governing Board, na lalong nagpapatibay sa kanilang institusyonal na ugnayan, lalo na sa paghahanda ng SEARCA sa pagdiriwang ng ika-60 anibersaryo nito.
Si Prof. Gevaña ay kinikilala bilang isa sa mga nangungunang eksperto sa larangan ng environmental management at forestry. Patunay rito ang kanyang mga natanggap na parangal kabilang ang UP Scientist 3 Award (2024–2026), Outstanding Teacher Award (2025), at APAFRI Forestry Award (2024).
Bilang bahagi ng kanyang pagkakahirang, magbibigay si Gevaña ng pampublikong lektyur na pinamagatang “An Interdisciplinary Approach to Mangrove Conservation and Local Livelihood Development in Southeast Asia (SEA): Challenges and Opportunities for Collaborative Blue Carbon Governance.” Layunin nitong ipakita kung paano maaaring pagsamahin ang siyensya, konserbasyon ng bakawan, at kabuhayan ng mga komunidad upang matugunan ang epekto ng climate change at mapalakas ang sustainable development sa rehiyon.
Sa muling paglulunsad ng Professorial Chair Program, ipinakikita ng SEARCA ang patuloy nitong pagpapahalaga sa mga akademikong nangunguna sa pananaliksik at inobasyon. Kasabay nito, kinikilala rin ang mahalagang papel ng UPLB sa paghubog ng mga kaalaman, polisiya, at teknolohiyang magpapalakas sa agrikultura, pangangalaga sa kalikasan, at napapanatiling pag-unlad hindi lamang sa Pilipinas kundi sa buong Timog-Silangang Asya.